Жаҳон иқтисодиёти унумдорлик ўсиш суръатларининг секинлашуви, геосиёсий бўлиниш, юқори энергия нархлари ва молиявий харажатларнинг ошиши каби босимларга дуч келаётган бир пайтда, сунъий интеллект билан боғлиқ инвестициялар глобал иқтисодий фаолликни қўллаб-қувватламоқда. Халқаро валюта жамғармаси ҳисоб-китобларига кўра, 2025 йилда бундай технологик инвестициялар АҚШ ЯИМ ўсишига қарийб 0,5 фоиз ҳисса қўшган.

Бироқ инвестициялар ҳажмининг ортиши ҳали реал унумдорлик ошганини англатмайди. Асосий масала — корхоналар сунъий интеллект ёрдамида мавжуд меҳнат ва капитал ресурслари ҳисобидан кўпроқ маҳсулот ва хизматлар ярата олишидир. ХВЖ баҳолашларига кўра, сунъий интеллект узоқ муддатда жаҳон иқтисодиётининг йиллик потенциал ўсишини 0,1–0,8 фоизга ошириши мумкин.

Шу билан бирга, AI билан боғлиқ компаниялар даромадлари бўйича юқори бозор кутилмалари инвестицияларнинг келажакдаги самарадорлигини исботлаш босимини ҳам оширмоқда. Жаҳон банки эса ривожланаётган мамлакатлар учун асосий имконият мавжуд технологияларни маҳаллий эҳтиёжларга мослаштириш ва уларни иқтисодиётга самарали жорий этишда эканини қайд этади.

Ўзбекистон учун сунъий интеллектнинг иқтисодий қиймати саноат, қишлоқ хўжалиги, логистика, молия, давлат хизматлари ва кичик бизнесда унумдорликни ошириш, харажатларни камайтириш ҳамда янги бозор имкониятларини яратишда намоён бўлиши мумкин. Бунинг учун рақамли инфратузилма, малакали кадрлар, сифатли маълумотлар ва ишончли энергия таъминоти зарур.