Янгиликлар
Давлат харидларида сунъий интеллект: рискларни бошқаришнинг янги босқичи
Давлат харидларида маълумотлар ҳажми ва операциялар сони ортиб бораётган бир шароитда сунъий интеллект технологиялари назоратни автоматлаштириш воситасигина эмас, балки рискларни олдиндан аниқлаш инструментига айланиши мумкин.Халқаро амалиётда Machine Learning, LLM ва RPA технологиялари тендер маълумотларини таҳлил қилиш, шубҳали нарх шаклланишини, рақобатдаги аномалияларни ва эҳтимолий келишувларни аниқлашда қўлланилмоқда. Масалан, Бразилиянинг “Alice” тизими 2023 йилда қарийб 191 мингта харидни таҳлил қилиб, 203 та аудит жараёни бошланишига асос яратган. Бунда аудитни бошлашгача бўлган ўртача муддат 400 кундан 8 кунгача қисқарган. Ўзбекистон учун бундан чиқариладиган асосий хулоса шуки, СИ инсон қарорини алмаштирмаслиги, балки назорат органларининг аналитик салоҳиятини бир неча баробар ошириши керак. Шу боис давлат харидлари платформасида СИга асосланган риск-аналитика модулини жорий этиш шубҳали харидларни эрта аниқлаш, рақобат муҳитини ҳимоя қилиш ва назорат ресурсларини энг юқори рискли ҳолатларга йўналтириш имконини беради.
B-READY 2025: бизнесни бошлашдан бизнесни ривожлантиришгача
Жаҳон банкининг Business Ready 2025 баҳолаши Ўзбекистонда бизнесни бошлаш учун институционал шароитлар яхшиланаётганини кўрсатади. Бизнесни бошлаш, жойлаштириш, коммунал ва молиявий хизматлар ҳамда солиққа тортиш йўналишларидаги натижалар бунинг далилидир.Бироқ иқтисодий ривожланиш нуқтаи назаридан бизнес муҳитининг ҳақиқий сифати бизнесни бошлаш қулайлиги билан эмас, балки бозорда қиймат яратиш ва самарали рақобат қилиш имконияти билан белгиланади.Шу жиҳатдан, рақобат, низоларни ҳал этиш, халқаро савдо, шунингдек, бизнесни тугатиш ва тўловга қобилиятсизлик йўналишлари алоҳида аҳамият касб этади. Чунки самарали иқтисодиёт нафақат янги бизнесларнинг бозорга киришини таъминлайди, балки самарасиз фаолиятнинг бозорни тарк этиши ва ресурсларнинг янада самарали субъектларга йўналтирилишига ҳам имкон беради.
Ўзбекистон фармацевтика саноати: навбатдаги босқич — миқдордан сифатга
Бугунги кунда республикамизда 300 дан ортиқ фармацевтика корхонаси фаолият юритмоқда, сўнгги йилларда соҳага 1,8 млрд доллардан ортиқ инвестиция йўналтирилди. Бироқ 2023 йилда маҳаллий ишлаб чиқариш ички бозор талабининг атиги 18 фоизини қоплагани муҳим бир саволни юзага чиқаради: ишлаб чиқариш салоҳиятини қандай қилиб реал рақобат устунлигига айлантириш мумкин?Ҳиндистон тажрибаси шуни кўрсатадики, фармацевтика саноатининг барқарор рақобатбардошлиги заводлар сони билан эмас, балки биоэквивалентлик, илмий-тадқиқот ва халқаро сертификатлашни ягона ишлаб чиқариш-экотизимига бирлаштириш билан таъминланади. Шу боис Ўзбекистон учун кейинги вазифа янги қувватларни кўпайтиришдан кўра, маҳаллий ишлаб чиқарувчиларнинг халқаро бозорга чиқишини тезлаштириш ва харажатларини камайтиришдан иборат бўлиши керак. Бунда рўйхатдан ўтказиш ва сертификатлаш тизимини такомиллаштириш, сифат инфратузилмасини кучайтириш ҳамда юқори қўшилган қийматли маҳсулотлар ишлаб чиқаришини кенгайтириш муҳим. Жаҳон банки ҳисоб-китобларига кўра, бундай ислоҳотлар 188 млн долларгача қўшимча хусусий инвестиция ва 20 мингтагача иш ўрни яратиши мумкин.Демак, фармацевтика соҳасининг кейинги босқичи корхоналар сонининг ўсиши билан эмас, балки халқаро стандартларга мос, юқори қўшилган қийматли ва жаҳон бозорида рақобатлаша оладиган маҳсулотлар улуши билан баҳоланиши лозим.
Ишонч телефони
Сизда ариза, шикоят ёки таклифлар мавжудми? Бизга ишонч телефонлари орқали мурожаат қилинг!